Граѓани и студенти ја продолжија блокадата на зградата на Радио-телевизија на Србија на улицата Таковска, која трае од недела навечер. Утрово дел од вработените во РТС се обиделе да влезат во зградата, но, како што објавија насобраните на социјалните мрежи, „по убедување и аплаузи се откажале“.
Граѓани и студенти се собраа и кај познатата ќебапчилница преку која во зградата на јавниот сервис влегоа претходно работниците на РТС.
Собрани луѓе има и во студиото на РТС во Кошутњак.
На улицата цела ноќ беа присутни голем број студенти и граѓани, кои на вчерашното собрание се договорија во раните утрински часови организирано да им се придружат на студентите во блокадата.
РТС утрово не ја емитува утринската програма, иако беше најавена, како и секое утро од 5.55 до 8 часот. Наместо утринска програма, од утрово на првиот канал на РТС се емитува филмот „Егзодус: богови и кралеви“ со Кристијан Бејл во главната улога.
Не се емитуваа ни вестите во 19 часот. Гледачите на РТС можеа да ја следат програмата еден час порано, во 18 часот, но без водител и со однапред подготвени програми.
На сајтот на РТС нема информации зошто нема утринска програма, дали ќе се емитува и кога, но нема вести за блокадата, а „студентите во блокада“ објавија дека утринската програма е откажана.
Во текот на претходните денови, од блокадата на зградата на РТС во центарот на Белград, утринската програма доцнеше најмалку половина час.
За потсетување, студентите веќе четири дена го блокираат Јавниот сервис на улицата Таковска и на Кошутњак, барајќи да се распише нов конкурс за членови на Советот на Регулаторното тело за електронски медиуми (РЕМ).