Македонија се наоѓа на маргините на премин од состојба која долго време се формираше, и која е обележана со висок степен на корупција, партизираност на институциите и пад на духот на народот, изјави за „Локално“ социологот Проф. д-р Илија Ацески. Според него, психолошки сме на работ на големо разочарување, а ваквите настани, како оној во Кочани, но и претходни, ни даваат јасно сознание дека не можеме да продолжиме вака. Според професорот Ацески потребни се итни реформи на властите без да прецизира на боја и партија, со кои на народот ќе им биде ставено во дознаење дека ги очекува подобра иднина.
„Во овој момент, Македонија се наоѓа на маргините на премин од една состојба која долго време се формираше, а која главно ја обележува висок степен на корупција, партизираност на институциите и пад на духот на народот. Психолошки, сме до тој степен малтретирани и доведени до работ на големо разочарување. Ваквите настани, не само овој што се случи во Кочани (иако имаше и претходно слични случаи, кои не треба да ги повторуваме), ни даваат јасно сознание дека понатаму не можеме вака да продолжиме и дека се потребни радикални потези од властите, без разлика кој ја води државата. Мора да се започне со радикално реформирање на институциите, особено во оние области каде државата има најголема одговорност. Овие реформи треба да дадат сигнал дека ќе бидат патоказ за посакуваната иднина и дека ќе резултираат со подобар живот и поголема социолошка релаксираност во односите во Македонија“ изјави Ацески.
Професорот Ацески смета дека при собирањето донации потребен е спонтан карактер и димензија, без да биде инцирано или претерано нагласено од страна на партиите. Според него, донациите треба да бидат резултат на лична одлука и чувство на човекот кој ќе се реши да помогне, а не да се користат за собирање политички поени.
„Потребен е спонтан карактер и димензија, која не треба да биде пренагласена или инцирана од партиите, со цел да не се собираат политички поени на вакви трагедии. Треба да се остави на самото чувство на човекот кој ќе се реши да донира за одредена помош или поддршка, но не и да се политизира. Не треба да се пренагласува премногу, иако донирањето е позитивно, тоа станува несимпатично ако се користи за добивање политички поени, претворајќи ја помошта во партиско-политичка димензија која ги искористува болката на народот“ смета Ацески.
Ацески истакна дека медиумскиот простор во Македонија е доминиран од политички емисии, додека содржините со културен и научен карактер се многу ретки. Според него, повеќето телевизиски програми се партиско-политички ориентирани, а малку се тие што се фокусирани на актуелните настани од други сфери, како културата или науката. Тој нагласи дека општеството се наоѓа во состојба на депресија, каде што настаните се гледаат, но не се забележуваат позитивни промени. Професорот посочи дека Македонецот како поединец треба да се чувствува поврзан со нешто повеќе од политиката и да има простор за културни и научни настани кои не се обременети со политички влијанија.
„Да почнам од медиумскиот простор. Многу малку емисии имаат информативен карактер кои се однесуваат на настани од културен или научен карактер, и тоа во една смисла да не ја содржат партиско-политичката димензија. Тоа многу малку се случува. 90% од емисиите се политички, ако ги исклучиме турските серии. Нашите телевизии се претежно партиско-политички програми, изјави на политичари, и настани кои укажуваат на тоа дека партијата е над се. Мислам дека ако малку погледнеме во општеството, тоа не е така. Во многу земји има повеќе содржини со информативен карактер, посветени на културата или науката. Кај нас, нема ни 5 до 10 минути информации кои не се политички. Ова говори и за други политички причини, за кои не би навлегувал, но тоа води кон колективна депресија на Македонецот – депресија во смисла дека нешто се случува, а нема никакви промени. Тука лежи проблемот. Не се оттргнува свеста за тоа, а вниманието треба да се насочи и кон настани од сферата на културата или пошироко. Треба да се почувствува дека постојат нешта надвор од политиката, кои не обременуваат“ завршува Ацески.
Д.Ѓ