Москва е под невидени безбедносни мерки во пресрет на прославата на 80-годишнината од Денот на победата, што ќе се одржи на 9 мај. Главниот град на Русија е практично под блокада – електронската комуникација е прекината, мобилниот интернет се исклучува повремено со часови, а на влезовите во градот има засилени полициски патроли кои селективно запираат возила.
Засилените мерки доаѓаат по масовниот напад со беспилотни летала од страна на Украина, кој парализираше неколку московски аеродроми. Како одговор, Русија изврши удари врз Киев, по што следеше релативно затишје, што се совпадна со тридневното примирје прогласено од рускиот претседател Владимир Путин. Украина го отфрли примирјето, а борбените активности продолжија, вклучувајќи и нови руски напади со тешки воздушни бомби врз Сумската област.
Русија тврди дека соборила рекордни 524 дронови за 24 часа, додека Украина призна дека лансирала 187, од кои 81 биле соборени. Информациите доаѓаат во време кога Москва се подготвува за воената парада на Црвениот плоштад, на која се очекуваат лидери од 29 земји, вклучувајќи го и претседателот на Србија, Александар Вучиќ.
Воените канали на Телеграм објавија шпекулации за можна употреба на новата руска ракета „Орешник“ во случај на украинска провокација, иако Кремљ официјално не се огласи. Русија постави системи за воздушна одбрана „Панцир-С1“ на покривите на зградите во Москва, како дел од зајакнувањето на безбедноста, откако дрон погоди дел од Кремљ во мај 2023.
Украина, пак, располага со низа беспилотни летала со дострел до 1.000 км – меѓу нив UJ-22, „Бобр“, „Љути“, како и нови хибридни системи. Постојат и извештаи за развој на балистички ракети и модифицирани крстосувачки проектили од типот „Нептун“, наменети за напади во внатрешноста на Русија, но без потврдени успешни операции.
Аналитичарите проценуваат дека евентуален напад врз Москва најверојатно би имал психолошка и пропагандна цел, отколку вистински воен ефект. Рускиот воен аналитичар Александар Коч предупреди дека Москва би можела да одговори со масовни ракетни напади или засилен притисок на фронтот, наместо со избрзана одмазда.
Од Западот доаѓаат повици за воздржаност. „Вашингтон пост“ објави дека западните разузнавачки извори сметаат оти напад врз Москва е малку веројатен, бидејќи би можел да предизвика силна руска одмазда и да го доведе во прашање меѓународниот легитимитет на Украина.
Додека светските лидери се собираат во Москва, ситуацијата на теренот останува напната. Денот на победата, традиционално симбол на воена моќ и национален престиж, оваа година се одвива во сенка на модерната беспилотна војна и глобалната геополитичка неизвесност.