Членот на Претседателството на БиХ, Милорад Додик, во вторникот во Москва се сретна со рускиот претседател Владимир Путин и со поддршка на медиумите што ги контролира, таа средба ја претвори во дел од неговата кампања за изборите што ќе се одржат во БиХ на 2 октомври.
Путин го примил Додик на позната бела маса во неговиот кабинет во Кремљ, а на снимката која ја објави Телевизијата на Република Српска (РТРС) се гледа дека двајцата срдечно се ракуваат, односно дека рускиот претседател не инсистирал на физичка дистанца, како што правеше пред да се обиде да избегне инфекција со коронавирусот.
Како што јави РТРС, Путин му рекол на Додик дека се надева оти „патриотските сили во РС“ ќе победат на претстојните избори, односно дека сака Додик да победи во изборната трка за претседател на тој ентитет, што го смета за предуслов за натамошно зајакнување на врските меѓу РС и Русија.
Додик на рускиот претседател му одговорил дека е важно Путин да се заложи за зачувување на Дејтонскиот договор, бидејќи го смета за гаранција за опстанокот на Република Српска.
„Секогаш ни е важно да имаме пријатели како вас. Вистина е, имаме избори, а јас се кандидирав за претседател на Република Српска. Сите анкети велат дека нема да има никакви проблеми. Се надеваме на добар резултат“, му рекол Додик на Путин.