Претседателот на Русија Владимир Путин го смени Дмитриј Рогозин од шефот на државната корпорација „Роскосмос“ и на негова функција го назначи поранешниот заменик-премиер на Русија Јуриј Борисов.
Указот е објавен на веб-страницата на Кремљ.
„Да се назначи Јуриј Борисов за генерален директор на Државната корпорација за вселенска дејност „Роскосмос“. Указот влегува во сила од денот на потпишувањето“, се наведува во документот.
Путин го разреши Борисов од функцијата вицепремиер на Русија.
Рускиот лидер потпиша и указ за промени во структурата на федералните извршни тела – наместо 11 вицепремиери, ќе има 10, објавено е на веб-страницата на Кремљ.
Рогозин е на чело на „Роскосмос“ од 24 мај 2018 година. Пред тоа ја извршуваше функцијата вицепремиер на руската влада за Воено-индустриски комплекс. По назначувањето на Рогозин за прв човек на „Роскосмос“, Борисов ја презеде таа функција.
Пред да биде именуван на функцијата вицепремиер, Јуриј Борисов беше заменик-министер за одбрана од 2012 година.