Рускиот претседател Владимир Путин постхумно го одликуваше православниот свештеник Михаил Василиев, кој неодамна загина во Украина. Свештеникот го доби „Орденот на херој на Руската Федерација“, што е највисокото признание во Русија.
Според независниот руски портал „Медуза“, Путин го наградил свештеникот „затоа што бил храбар херој додека ја исполнувал својата пасторална должност“.
Патријаршијата во Москва во неделата соопшти дека свештеникот Василиев „починал на 6 ноември во зоната на специјалните операции во Украина додека ги извршувал своите свештенички должности“.
Рускиот патријарх Кирил денеска ќе одржи посебна богослужба во црквата Христос Спасител во Москва по повод смртта на свештеникот.
Василиев на светот му стана познат кога во октомври беше објавено видео во кое тој ги критикува мажите кои сакаат да избегнат мобилизација. Но, тој не ги критикуваше само мажите, туку и мајките кои не сакаат нивните синови да војуваат. Свештеникот ги советуваше жените „да раѓаат повеќе деца за да не им биде толку болно и страшно да ги праќаат во војна“.