Рускиот претседател Владимир Путин помилува поранешен полицаец осуден на затвор поради неговата улога во убиството на новинарката Ана Политковска, бидејќи им се придружил на руските сили во борбите во Украина, изјави неговиот адвокат за „Франс прес“.
Сергеј Хаџикурбанов беше осуден на 20 години затвор за неговата улога во убиството на Политковска во 2006 година.
„Само што дознав од неговите роднини дека на почетокот на специјалната воена операција му бил понуден договор за учество во неа. Тој го направи тоа и, кога беше завршен договорот, беше помилуван со указ на претседателот“, рече адвокатот Алексеј Михалчик.
Специјална воена операција е терминот што Русија го користи за офанзивата започната против Украина во февруари 2022 година.
Според адвокатот Михалчик, Хаџикурбанов требало да ја отслужи казната до 2030 година, но му бил понуден договор во замена за помилување за неговата вмешаност во единицата на руските специјални сили.
Десетици илјади руски затвореници потпишале такви договори со војската или паравоените групи како „Вагнер“, наведе „Франс прес“.