Рускиот претседател Владимир Путин изјави дека некои земји сакаат да ја истуркаат Русија од светската економска арена, но дека тоа е невозможно и таа нема намера да го стори тоа.
Според „Спутник“, зборувајќи за санкциите што Западот ги воведе кон Русија поради инвазијата на Украина, тој посочи дека овие мерки ги погодуваат сите и тврди дека толку висока инфлација во западните земји не е забележана во последните 40 години.
„Ова не е шега“, коментира Путин, кој преку видеоконференција им се обрати на учесниците на пленарната сесија на Евроазискиот економски форум.
Путин ги коментираше странските компании кои ја напуштија Русија по руската инвазија на Украина, велејќи дека „можеби тоа е најдобро“, дека домашните компании ќе го заземат нивното место и дека ништо нема да се промени.
Путин рече дека е „невозможно да се отсече Русија од западната технологија и покрај санкциите“.
Западната кражба на ресурси нема да заврши добро
Рускиот претседател наведува дека „Русија има проблеми со транспортот и синџирите на снабдување“, додавајќи дека „ќе продолжи да увезува замени за стоките под санкции“ и дека „на крајот на краиштата тоа не е решение“.
„Оваа западна кражба на ресурси нема да заврши добро“, рече Путин, додавајќи дека Русија е „конкурентна“ и „останува водечки извозник на пченица“.
„Западните земји кои се обидуваат да ги казнат другите со економски санкции ја преценуваат својата сила. Се повеќе земји во светот сакаат и ќе водат независна политика“, нагласи Путин.
„Ниту еден ‘светски полицаец’ не може да го запре овој природен глобален процес. Никој не е толку силен. Тие се соочуваат со предизвици во нивните нации и се надевам дека разбираат дека оваа политика нема апсолутно никаква перспектива“, рече Путин.