Претседателот на Бугарија Румен Радев рече дека ситуацијата во земјава бара политичките сили во парламентот да не дозволат противречностите меѓу нив да ги поместат државните интереси.
Коментирајќи го развојот на политичката криза и излегувањето на „Има таков народ“ од владата, тој истакна дека довербата во политичкиот систем во Бугарија сега ќе зависи од постапките на политичарите.
„Затоа, очекувам и владата и пратениците додека одлучуваат за сопствената политичка иднина, да не ја заборават својата голема одговорност кон граѓаните и ветувањата за справување со инфлацијата, социјалната и економската криза. А тоа е нивното однесување и дејствувањето по овие прашања не зависи само од довербата во сопствените политички формации, туку и од довербата во политичкиот систем во Бугарија во целина“, коментира шефот на бугарската држава.
Лидерот на „Има таков народ“ (ИТН), Слави Трифонов, потврди дека дел од неговите пратеници ќе го напуштат и обвини дека тие се купени.
„Штотуку добив информација дека пратеници од ИТН ќе ја напуштат нашата пратеничка група и ќе ги поддржат Кирил Петков и Асен Василев. Најверојатно се купени со пари и функции. Ќе се види кој што ќе стане. Не мора да бидам гатачка за да знам дека ќе кажат многу лаги и измислици во стилот на Кирил и Асен само за да ги оправдаат своите постапки и да ја смират грижата на својата совест. Но, предавството е предавство и никој не ги сака предавниците. Дури и оние што имаат корист од нив“, напиша Трифонов на Фејсбук.