Бугарија и Северна Македонија водат интензивни разговори и наскоро се очекува работните групи да постигнат конкретни резултати, изјави денеска бугарскиот амбасадор во Тирана, Момчил Рајчевски за време на посетата на Корча.
– Ние сме во период на многу интензивни разговори со Северна Македонија. Новата бугарска влада формираше 10 работни групи кои работат за заеднички интерес и очекуваме наскоро да постигнат конкретни резултати. Претседателот Мета беше во официјална посета на Софија каде што бугарскиот претседател ја истакна безусловната поддршка на Бугарија за интеграцијата на Република Албанија, изјави Рајчевски, во однос на тоа дали Бугарија ја поддржува интеграцијата на Северна Македонија и Албанија во ЕУ.
Тој посочи дека неговата земја била и ќе остане еден од најактивните поддржувачи на европското проширување.
– Што ќе бара Албанија е одлука на Република Албанија. Не можам да коментирам кога станува збор за условите, но повторно велам дека Албанија си ја заврши својата работата, рече бугарскиот амбасадор, додавајќи дека не сака да ја коментира најавата на премиерот Еди Рама дека Албанија од ЕУ ќе побара одвојување од Северна Македонија во интегративниот процес.
На прашањето дали со оглед на војна во Украина, ЕУ треба да направи повеќе за Западниот Балкан, Рајчевски рече дека Унијата веќе прави многу, но смета дека „најважно во моментов е сите да се фокусираат на завршување на војната“.