Товарниот брод што гори крај холандскиот брег од вторникот вечерта превезувал речиси 500 електрични возила, значително повеќе од првично пријавените 25, објави во петокот компанијата за изнајмување бродови K Line.
Во пожар на товарниот брод Fremantle Highway, регистриран во Панама, кој превезувал нови автомобили, загинал индиски член на екипажот, а повредени се седум членови на екипажот кои скокнале во морето за да се спасат. На бродот имало 3.783 возила, вклучително и 498 електрични возила, изјави портпаролот на токиската K Line (Kawasaki Kisen Kaisha), која го изнајмила бродот. Не било откриено ништо за марките на автомобилите или дали бродот превезувал автомобили од јапонски производители.
Крајбрежната стража во четвртокот на својата веб-страница објави дека причината за пожарот е непозната, но на снимката на холандската телевизија RTL се слуша како лице од службата за итни случаи вели дека „пожарот започнал во батерија на електричен автомобил“. Литиум-јонските батерии на електричните возила горат со двојно поголема енергија од вообичаениот пожар, а поморските власти и осигурителите велат дека индустријата не успеала да држи чекор со ризиците. Панамските поморски власти започнаа истрага, а Холандија помага во истрагата, објави холандскиот одбор за безбедност.
Товарниот брод Fremantle долг 199 метри се уште гори и плови на околу 17 километри од најсеверниот холандски брег, соопшти крајбрежната стража. Тој отплови од Германија до Египет, пренесе „Ројтерс“, додека агенцијата dpa посочува дека последната дестинација бил Сингапур. Островите се во најсеверниот дел на Холандија и се дел од Ваденското Море, огромна област под влијание на плимата и осеката и со мочуришта што се протега низ Германија и Данска и е на листата на светско наследство на УНЕСКО. Доколку бродот се преврти или се распадне, постои ризик од еколошка катастрофа.