Пред Mercedes-Benz да го купи AMG и да му ја додели задачата да ги развива своите водечки модели со високи перформанси, марката беше независна и ја користеше својата експертиза за сите автомобили со трикрака ѕвезда. Една од најдобрите креации е моделот 560SEC, кој и покрај понудата од 544.560 долари, не се продаде на аукцијата во Тексас бидејќи не беше постигната резервната цена.
AMG произведе помалку од 50 примероци на моделот 560SEC 6.0 Widebody Coupe, а овој беше создаден во 1989 година и беше испорачан на клиент во Јапонија, каде што остана до 2016 година. Потоа бил увезен во Европа, каде продолжил да „живее“ во Велика Британија и Австралија. Потоа е транспортиран во САД, каде што е понуден на аукција што штотуку заврши.
Највисоката понуда беше 544.560 долари, но резервната цена не беше исполнета, па затоа не смени сопственик.
Автомобилот излегол од фабриката обоен во сино-црна металик боја, а претходниот сопственик го префарбал. И покрај неговата старост, сè уште е во одлична состојба и има оригинални OZ Racing бандажи со црни краци и полирани рабови. На бандажите се гуми Continental ExtremeContact Sport 02, а автомобилот доби и амортизери Bilstein-AMG.
Под хаубата се наоѓа брутален 6.0-литарски атмосферски V8 мотор, кој испорачува околу 390 КС. Тој е поврзан со четиристепен автоматски менувач, кој ги придвижува задните тркала преку диференцијал со ограничено лизгање.
Внатрешноста зрачи во духот на осумдесеттите, има удобни седишта Recaro со функција за греење, кои се прилагодуваат електронски. Климата е автоматска, пред возачот има волан Momo обложен со кожа, а внатрешноста е украсена со дрвени детали.
Автомобилот поминал околу 90.000 километри.