Кинезите добиваат ретки попусти за iPhone бидејќи производителот на овој мобилен телефон Apple е соочен со се поголема конкуренција од кинеските производители.
Станува збор за четиридневен попуст во износ до 500 јуани (68 долари) за некои модели на iPhone, кој ќе започне на 4 јануари. Кинескиот производител на мобилни телефони Huawei исто така ги намали цените на своите уреди за 20 отсто. Попустите дојдоа и бидејќи Кинезите се двоумат да трошат поради економските предизвици во земјата.
Водечките модели на мобилни телефони на Apple, некои постари модели на мобилни телефони, како и некои други уреди, се на попуст. Најголемиот попуст од 500 јуани има за iPhone 16 Pro, чија почетна цена е 7.999 јуани (1.092 долари), и iPhone 16 Pro Max, чија цена моментално е 9.999 јуани (1.365 долари).
Apple имаше сличен попуст минатата година пред лунарната нова година, која започнува на крајот на јануари.
„Стратегијата на Apple се смени за да се прилагоди на променливите потрошувачки навики на Кинезите. Трендот на попусти е атрактивен за клиентите. Apple би можел да заостане зад конкуренцијата доколку не усвои таква стратегија за цени“, рече Вил Вонг, виш менаџер за истражување во International Data Corporation (IDC).
Попустите дадени од Apple и Huawei одразуваат поширок тренд во Кина. Имено, на производителите на автомобили им нудат попусти од интернет гигантите за малопродажба бидејќи растот на другите светски економии забавува. Кинеската влада направи дополнителни напори за зголемување на јавната потрошувачка.
Така, минатата година беше започната трговска програма за поттикнување на населението да ги замени старите работи за нови, вклучувајќи автомобили и апарати за домаќинство. Оваа програма неодамна е проширена на мобилни телефони, таблети, паметни часовници и фитнес нараквици.
Уделот на Apple на кинескиот пазар е под зголемен притисок од кинеските производители, како што се Vivo и Xiaomi. Американскиот производител се врати во првите пет најпродавани производители на паметни телефони на кинескиот пазар, откако беше надвор од првите пет најпродавани во третиот квартал од минатата година.
Според најновото истражување на IDC, Vivo е најпродаваниот производител на паметни телефони во Кина – неговата продажба во споменатиот период е зголемена за повеќе од 20 проценти. Истовремено, продажбата на Huawei е зголемена за повеќе од 40 отсто, а на Apple за 0,3 отсто.
Huawei, чие седиште е во Шенжен, претстави неколку нови уреди со напредна технологија и покрај тоа што се соочува со ограничувања од САД, јавува Би-Би-Си.