Регистрирани 995 пациенти со мултипла склероза во државава

од Vladimir Zorba

Во државава се регистрирани 995 пациенти со мултипла склероза од кои 491 се на редовна терапија, а останатите се ново дијагностицирани и уште не се поставени на терапија, изјави директорот на Универзитетската клиника за неврологија Иван Барбов на денешното одбележување на Светскиот ден на мултипла склероза организирано од Националното здружение за помош и поддршка на лица со мултипла склероза во Скопје.

Барбов додаде дека пациентите кои се неподвижни заради влошување на болеста не ги исполнуваат критериумите за примање на терапија.

– Терапијата се прима до одреден степен, пациентите кои се во колички, во кревет и се инвалидизирани за нив ни еден лек не делува од овие што се до сега достапни, така да кога ќе помине скорот над шест ипол тие пациенти се исклучуваат од терапија за да може терапија да прими пациент кој ги исполнува критериумите. Од посочените 491 пациенти, 42 не примиле терапија во мај, а тоа е 8,5 отсто. Тоа е заради тоа што пациентите не ја примаат редовно терапијата, ако примаат редовно нив на крајот на месецот ќе им завршат ампулите и треба да дојдат по нови. Меѓутоа тие прават пауза или ја прескокнуваат терапијата неколку месеци за банални работи, најчесто поради температура или настинка, но нередовната терапија води до побрза прогресија на болест, дури и од оние што се без терапија, додаде Барбов.

Сепак, како што рече Барбов, државата може да се пофали со најсовремена терапија во регионот од државите на Западен Балкан затоа што имаме најголема покриеност на пациентите со терапија и први во регионот кои го воведовме лекот „Ocrevus“.

Ден Дончев, директор на Фондот за здравствено осигурување изјави дека годинава Фондот го зголеми буџетот на клиниката за неврологија од 190 милиони на 265 милиони денари, од кои 51 милион денари се наменски за пациентите со мултипла склероза.

– Излеговме во пресрет на Клиниката за неврологија и на потребите на пациентите со оваа мистериозна болест, со значителното зголемување и со овој условен буџет воведовме можност повеќе пациенти да ја примаат терапијата на иновативните лекови „Mavenclad“ и посебно „Ocrevus“, што дава нова надеж на тие лица, бројката е под нивото што треба, но сепак има значително зголемување и се надеваме дека во следната година ќе имаме можност повторно да овозможиме уште поголем буџет за овие лица, додаде Дончев.

Ана Карајанова-Домитрушева, претседател на Националното здружение за МС рече дека здружението формирано во март годинава е доброволно, невладино, непартиско, непрофитно граѓанско здружение кое има за цел да работи на подигнување на свеста за мултипла склероза и да пружи поддршка на сите чинители кои вложуваат напори за спроведување на реформи во здравствениот и социјалниот систем во нашата држава.

Додаде дека и покрај евидентниот напредок што е направен изминатиот период се уште има потреба од унапредување на грижата за лицата со мултипла склероза и адекватен, соодветен третман како на пример, навремена дијагностика и современ третман согласно светските стандарди и зголемување на достапноста на високо ефикасни иновативни лекови.

– Една неодамнешна студија спроведена во европските земји покажа дека директните и индиректите трошоци за пациент со повисок степен на инвалидитет се за повеќе од два пати повисоки наспорти пациент со понизок степен на ивалидитет што значи дека треба да се стремиме да обезбедиме доволно адекватни лекови за сите пациенти со мултипла склероза бидејќи е поисплатливо на подолг временски период. Ова води кон зачувување на квалитетот на животот на болните, можност за нивна интеграција во општеството и реализација како функционални, работноспособни и корисни граѓани. Во спротивно би се довеле во ситуација од користење на инвалидска пензија, отропедски помагала, надоместок за нега, мобилност кое што секако задава голем удар на пациентот и неговото семејство но е и голем трошок за пензискиот, здравствениот и социјалниот фонд, појасни Карајанова-Домитрушева.

loading...

Слични содржини