Водечкиот суд за човекови права во Европа пред неколку дена донесе револуционерна пресуда: швајцарската влада ги прекрши правата на своите граѓани затоа што се покажа како недоволно амбициозна во борбата против климатските промени.
Одлуката на Европскиот суд за човекови права во Стразбур претставува вистински преседан кој ќе послужи како пример за идни слични спорови во Европа и пошироко, пишуваат медиумите.
Повеќе од две илјади жители на Швајцарија, собрани во Здружението на постари жени за заштита на климата, ја тужеа државата затоа што нејзиното непостапување го загрозува нивното здравје и ги изложува на поголем ризик од смрт за време на топлотните бранови.
Претседателката на судот, Шифра Олири, нагласи дека владата ги загрозува нивните права на семеен живот затоа што не ги спроведувала адекватните домашни политики за спречување на климатските промени. Таа додаде дека Швајцарија во минатото не ги исполнила целите поврзани со намалување на емисиите на стакленички гасови.
Бројни активисти ја поздравија одлуката на Европскиот суд за човекови права и граѓанското движење. Меѓу нив е и глобалното движење на граѓанското општество „Avaaz“.
„Пресудата во случајот против Швајцарија обезбедува клучен правно обврзувачки преседан кој ќе послужи како план за тоа како успешно да ја тужите сопствената влада за климатски неуспех“, рече Рут Делбер од „Avaaz“.
Но, што всушност значи оваа одлука во пракса?
Пресудата, која не може да се обжали, може да ги принуди властите да преземат поголеми чекори за ограничување на штетните емисии, вклучително и ревидирање на нивните цели до крајот на деценијата за да се совпадне со долната граница на Парискиот договор за ограничување на глобалното затоплување на 1,5 °C.
Истиот ден беше донесена пресуда во судски процес во кој млади Португалци тужеа дури 32 европски земји, исто така поради неуспехот да ги скротат климатските промени.
Сепак, тие не излегоа како победници од спорот како Швајцарките бидејќи судот сметаше дека не е оправдано да се гони повеќе различни обвиненија и покрај фактот што влијанијата на емисиите на стакленички гасови ги преминуваат националните граници. Се наведува и дека младите од Португалија не ги исцрпиле сите правни опции во националните судови пред да дојдат пред Европскиот суд за човекови права.
Иако разочарана од исходот, претставничката на оваа младина, Софија Оливера, изјави дека победата на жените од Швајцарија е „победа за сите“.