Како подарок од претседателот Владимир Путин, Русија и достави на Северна Кореја повеќе од 70 животни, меѓу кои африкански лав, две кафеави мечки и 45 фазани.
Меѓу животните, кои биле пренесени од зоолошката градина во Москва, има два домашни јака, 40 мандарински патки и пет бели какаду. Транспортот до централната зоолошка градина во Пјонгјанг го надгледувале рускиот министер за природни ресурси Александар Козлов, а животните патувале со авион во придружба на ветеринари од московската зоолошка градина.
„Историски, животните отсекогаш имале посебна улога во односите меѓу државите. Тие беа дадени во знак на поддршка, добрина и внимание“, рекол Козлов.
Овој гест доаѓа во време на зајакнување на односите меѓу Русија и Северна Кореја за време на војната во Украина. Северна Кореја неодамна испрати 10.000 војници за да ги зајакне руските сили, а во јуни двете земји потпишаа договор за заемна одбрана, кој бара взаемна помош во случај на напад на двете страни.
За време на неговата посета на Русија, севернокорејскиот лидер Ким Џонг-Ун му подари на Путин пар кучиња пунгсан, додека двајцата се возеле наизменично во рускиот луксузен автомобил Аурус.
Овој договор дополнително ја зголеми загриженоста на западните земји за можна руска помош за нуклеарната или ракетната програма на Северна Кореја.
Руската влада објави фотографии на кои се гледа белиот какаду во бродска гајба додека Козлов ја обиколува корејската зоолошка градина со локалните власти.
„КЦНА“ во четвртокот објави дека ретките животни биле примени како подарок од Путин.
Исто така, во четвртокот, двете земји потпишаа протокол за соработка по состаноците за трговија, економија, наука и технологија во Пјонгјанг, според извештајот на агенцијата.
Руската новинска агенција „ТАСС“ претходно објави дека двете земји се договориле да го зголемат бројот на чартер летови, а од јануари до септември над 5.000 туристи патувале меѓу Русија и Северна Кореја, од кои над 70% користеле воздушен транспорт, пишува „Гардијан“.