Москва верува дека Европскиот суд за човекови права постапил политички и отстапувал од сопствената практика во одлуката за смртта на поранешниот офицер на Федералната служба за безбедност (ФСБ) Александар Литвиненко во Лондон во 2006 година, изјави портпаролката на руското Министерство за надворешни работи, Марија Захарова.
„(Одлуката) покренува многу прашања не само во суштината на заклучоците на ова меѓународно тело, туку и од гледна точка на постапката и пристапот на судот“, рече Захарова на редовниот брифинг.
Таа нагласи дека „постои уште еден доказ дека Европскиот суд, кој се позиционира како меѓународно судско тело, се стреми да игра политичка улога и да придонесе за атмосферата на русофобија, која стана толку популарна во некои западни земји“.
„Тоа е сосема неразбирлива позиција на судот, кој, всушност, одлучи да стави печат на јасно исполитизираниот и повеќе од сомнителен од правна гледна точка заклучок на националното судско тело на една од земјите -членки на Советот на Европа “, истакнала Захарова.
Таа додала дека е невозможно да не се забележат произволните отстапувања што судот ги направи од сопствената практика по одделни жалби поврзани со меѓудржавни спорови и посочи дека правната проценка на одлуката на судот во Стразбур ќе ја даде генералниот обвинител на Русија.
Захарова потсети дека „порано, Европскиот суд за човекови права се обврза да не ги разгледува таквите случаи додека не донесе одлука за клучните прашања во рамките на таканаречената поврзана меѓудржавна тужба“.
„На 23 февруари оваа година, Украина поднесе деветта тужба против нашата земја во врска со, како што рекоа, операции насочени кон елиминација на лица кои се сметаат за противници на Русија во Русија и во други земји – ова е формулирана жалба на Украина“, изјави портпаролката.
„Со оглед на тоа што жалбата на Литвиненко против Русија спаѓа во рамките на оваа меѓудржавна тужба, недоследноста на судот што требаше да го суспендира разгледувањето на жалбата е збунувачка, како што е случајот со илјадници други жалби поврзани со меѓудржавни случаи. Сметаме дека е недозволиво Европскиот суд да применува различни пристапи за идентични ситуации “, нагласи Захарова.
Европскиот суд за човекови права денеска ја прогласи Русија за „одговорна“ за смртта на поранешниот офицер на ФСБ Александар Литвиненко, нагласувајќи дека Русија не спровела ефикасна внатрешна истрага за неговото убиство. Пресудата е донесена по жалбата на вдовицата на Литвиненко – Марина Литвиненко.