Русија синоќа собори 110 украински беспилотни летала над Курската област, Москва и други области, соопшти утрово Министерството за одбрана.
Во соопштението објавено преку Телеграм, Министерството рече дека воздушната одбрана пресретнала 43 беспилотни летала над регионот Курск, каде што украинските војници спроведуваат копнена офанзива од август во обид да ги одвратат руските сили.
Други 27 беспилотни летала беа соборени над регионот Липецк, 18 над Ориол и еден над главниот град Москва, додека вкупно 21 беспилотно летало беа соборени над областите Нижни Новгород, Белгород и Брјанск, се наведува во соопштението.
Русија речиси секој ден објавува дека соборила украински беспилотни летала над своја територија, но обично помал број од овој.
Украина вели дека ги изведува овие напади, кои често се насочени кон енергетски инсталации, како одговор на руското бомбардирање на нејзината територија.