Европските членки на НАТО и Канада ги зголемија трошоците за одбрана за 20 отсто во 2024 година во споредба со претходната година, и тие сега изнесуваат над 485 милијарди долари, изјави денеска генералниот секретар на НАТО Марк Руте.
„Со нетрпение очекувам да бидам домаќин на министрите за одбрана во седиштето на НАТО следната недела, кога ќе разговараме за поголеми инвестиции во одбраната“, рече Руте како одговор на барањето на Ројтерс до НАТО да ги објави најновите податоци за трошоците за одбраната.
Руте рече дека дополнителните инвестиции на НАТО се зголемени во последните години од 640 милијарди долари на 700 милијарди долари. Одбранбените распределби за членките на НАТО се очекува да бидат објавени во среда на состанокот на министрите за одбрана на НАТО во Брисел, на кој ќе присуствува и американскиот секретар за одбрана Пит Хегсет, пренесува „Танјуг“.
Американскиот претседател Доналд Трамп врши притисок врз другите членки на НАТО да ги зголемат трошоците за одбрана од сегашната цел од два на пет проценти.