САД синоќа ја затворија амбасадата во Минск, а на вработените кои не се на неопходни позиции им беше дозволено да ја напуштат амбасадата во Москва со членовите на семејството, јавува Ројтерс.
-Ги презедовме овие чекори поради безбедносни прашања кои произлегуваат од неиспровоциран и неоправдан напад на руските воени сили во Украина, изјави американскиот државен секретар Ентони Блинкен.
На фотографијата објавена на Твитер од американската амбасадорка во Белорусија Џули Фишер во понеделникот се гледа како персоналот на мисијата го спушта американското знаме.
-Целиот американски персонал ја напушти Белорусија, објави Фишер на Твитер.
1/4 The United States of America has suspended operations of our embassy in Minsk. All American staff have departed Belarus. pic.twitter.com/Og8iynLdi6
— Julie Fisher (@USAmbBelarus) February 28, 2022
-Граѓаните на САД во Белорусија треба веднаш да ја напуштат земјата, се вели во соопштението на Стејт департментот.
Во Украина, работите на американската амбасада беа префрлени од Киев во Лавов две недели пред влегувањето на руските сили на територијата на источна Украина.
Белорусија е близок сојузник на Русија, на чија армија и отстапи сопствена територија за да ја нападне Украина.
Американските власти во понеделникот ја предупредија Белорусија дека и таа ќе ги трпи последиците од нејзината улога во рускиот напад. Европската унија, исто така, предупреди дека оваа недела ќе воведе нови санкции кон Белорусија.