Поради фотографирање на ризични места и таканаречени „селфи“, во светот се регистрирани 31 несреќа со смртен исход во првите седум месеци од оваа година, односно едно лице го губи животот неделно, покажува студијата на Фондацијата ИО, која е специјализирана за тропска и патничка медицина.
Од истата причина, во периодот од јануари 2008 година до јули минатата година, во светот умреле најмалку 379 луѓе, во просек по еден човек на секои 13 дена, покажува студијата што ја пренесе шпанскиот весник „Паис“.
Како што беше проценето, трендот е нагорен и по кратка пауза поради пандемијата, силно се појави повторно во првите седум месеци од оваа година.
Од починатите, 141 биле туристи, а 238 локални жители, што покажува дека апетитот за ризик е многу поголем кај туристите.
На листата од повеќе од 50 земји, најмногу смртни случаи се регистрирани во Индија (100), САД (39) и Русија (33), додека Шпанија го дели шестото место со Австралија со 15 смртни случаи.
Авторите на студијата идентификувале и десет места во светот со најмногу жртви.
Тоа се, според бројот на случаи, Нијагарините водопади (на границата меѓу САД и Канада), Големиот Кањон (САД), Чарко дел Буро (Колумбија), плажата Пена (Бразил), водопадот Мланго (Кенија), планините Урал (Русија), Таџ Махал и долината Дудпатри (Индија), островот Нуса Лембонган (Индонезија) и архипелагот Лангкави (Малезија).