Ана Естела Марадона, сестрата на покојниот Диего Марадона, сведочеше во четвртокот на судењето на лекарите и медицинскиот персонал за смртта на легендарниот фудбалер. Таа практично ги обвини ќерките на Марадона, посочувајќи дека „се грижеле за него по операцијата“.
Ана Естела последен пат го видела својот брат на клиника по операцијата, а во неколку наврати истакнала дека потоа за него се грижеле неговите ќерки Далма и Ѓанина, а контактот на сите со Марадона бил ограничен поради правилата кои важат поради пандемијата на Ковид.
Таа додаде дека се разговарало за понатамошната грижа на Марадона да ја преземат лекарите од клиниката и дека секогаш ќе има брза помош. Адвокатите изјавија дека има снимка од тој разговор и дека ќе се пушти во судница.
Во четвртокот сведочеше и другата сестра на Марадона, Клаудија Нора Марадона, но нејзиното сведочење беше поинакво. Таа нагласи дека сите одлуки за понатамошно лекување се донесени заеднички, а еден од обвинетите д-р Леополд Лук го опиша како доктор од доверба.
Во овој дел од судењето имаше и тензии затоа што адвокатот на ќерките на Марадона ја испрашуваше Клаудија Нора за контролата на мултимилионските сметки поврзани со брендот на Марадона.
Во петок ќе сведочи третата сестра на Марадона, Рита Мабел Марадона, а на следното рочиште ќе сведочи мајката на синот на Марадона, Вероника Оједа.