Северна Кореја упати критики до Меѓународната агенција за атомска енергија (МААЕ) за тоа дека ја гарантирала безбедноста на испуштањето на прочистена радиоактивна вода од нуклеарната централа Фукушима погодена од хаварија. Пјонгјанг повторно го изрази своето несогласување со планот на Јапонија да ја испушти водата во океанот, објавија државните медиуми.
Планираното испуштање вода ќе има „фатални негативни ефекти врз животот и безбедноста на луѓето и еколошката средина“, изјави висок функционер на севернокорејското Министерство за земјоделство и заштита на животната средина, цитиран од корејските медиуми.
МААЕ во вторникот го објави својот извештај за безбедноста на планираното испуштање вода, во кој се вели дека тоа е „во согласност“ со меѓународните безбедносни стандарди и ќе има „незначително радиолошко влијание врз луѓето и животната средина“ доколку се спроведе.
„Тоа, што има значење, е несовесното однесување на (МААЕ), која активно го заштитува и го олеснува планираното од Јапонија исфрлање на вода загадена со нуклеарно гориво, што е незамисливо“, се вели во соопштението.
МААЕ „не е тело за проценка на животната средина (еколошка)“, рече високиот севернокорејски функционер. Според него, во меѓународното право не постои одредба или клаузула која вели дека нуклеарниот набљудувач има право да дозволи една земја или регион да испушта „нуклеарно загадена“ вода.
Пјонгјанг, исто така, го критикуваше „типичното прикажување на екстремни двојни стандарди“ на генералниот директор на МААЕ, Рафаел Гроси, велејќи дека тој го осудил „искористувањето на своето легитимно право“ на Северот да продолжи со нуклеарни програми, игнорирајќи ги дејствата на Јапонија.