Околу педесет вработени во нуклеарната централа Запорожје, на југот на Украина, која е под окупација на руските сили од март, „се уште се заробеници“ на Русите, изјави шефот на украинската државна нуклеарна компанија „Енергоатом“.
Од почетокот на руската инвазија на крајот на февруари, повеќе од 150 вработени во централата беа заробени, а некои се ослободени, но има луѓе за кои се уште не се знае каде се наоѓаат, рече Петро Котин и додаде дека некои се убиени, а некои биле мачени.
Тој рече дека „Енергоатом“ ќе објави список со имиња на вработени кои се уште се во раце на Русите и ќе ја повика меѓународната заедница да помогне во нивното ослободување.
Зборувајќи за притворот на поранешниот генерален директор на централата, Игор Мурашов, кој Русија го уапси на крајот на септември, а по неколку дена го ослободи, рече дека Русите го држеле во подрум три дена. Тој рече дека е тортура да се држи некој на стол цел ден со торба преку глава. Тој рече и дека Русите правеле пропагандни видеа со Мурашов.
Директорот рече дека не знае каде се двајца вработени во централата кои, според украинските власти, се киднапирани: директорот за информации на централната канцеларија Олег Костјуков и помошникот генерален директор Олег Ошека.