Извршниот директор на Фолксваген, Оливер Блуме, денеска изјави дека предлозите на синдикатот за намалување на трошоците се почетна точка за преговори, но дека тие во никој случај не се доволни за решавање на проблемите на компанијата.
„Ние, менаџментот, не работиме во свет на фантазии. Носиме одлуки во средина што брзо се менува. Загрижени сме за иднината на нашата компанија“, им рече Блуме на илјадници работници собрани на собранието во Волфсбург.
Претседателката на работничкиот совет на Фолксваген, Даниела Кавало, предупреди дека работниците ќе мора да направат болни компромиси за преговорите со раководството да завршат до Божиќните празници, пишува Блумберг.
„За тоа ќе бидат потребни компромиси и отстапки кои не ви се допаѓаат и кои понекогаш ве повредуваат“, рече Кавало на собранието.
Познатиот германски производител на автомобили се бори поради падот на побарувачката за електрични возила, повисоките оперативни трошоци и зголемената конкуренција од кинеските производители.
Менаџментот на Фолксваген планира да затвори три фабрики во Германија и да отпушти илјадници работници за да ги намали трошоците, но синдикатите се залагаат за други решенија кои ќе ги зачуваат работните места и ќе ги заштитат правата на работниците.