Шест лица се пронајдени мртви во луксузна хотелска соба во центарот на Бангкок, а тајландската полиција се сомнева дека причината за смртта е труење, објави Sky News.
Полицијата вели дека нема индиции за грабеж и насилство, но како што велат, траги од цијанид (брзо дејствувачка, смртоносна хемикалија) се пронајдени во чашите и чајникот во собата.
Четворицата виетнамски државјани и двајца американски државјани ги пронашол член на персоналот на хотелот во собата, која била заклучена одвнатре.
Храната нарачана од собната услуга била пронајдена недопрена внатре во собата – но биле испиени пијалоци.
Четири од телата биле во дневната соба, а две во спалната соба.
Хотелските записи покажаа дека немало други посетители во собата.
Полицискиот генерал-полковник Траиронг Фивпан, шеф на форензичкиот оддел на тајландските полициски сили, на прес-конференција во средата изјави дека еден од шестмината е оној што ги извршил убиствата во хотелот Гранд Хајат Ераван.
„Откако персоналот донесе чаши и две шишиња со топла вода, млеко и чајници… еден од шесте ставил цијанид“, рече тој.
Интервјуата со роднините на загинатите открија дека имало спор околу долгови, соопшти полицијата.
Службениците рекоа дека истрагата – помогната од ФБИ – исто така открила можен мотив да биде конфликт меѓу шесте жртви во врска со мултимилионски инвестиции во бахти.
Трите мртви жени се именувани како 46-годишната Нгујен Ти Фуонг, Шерин Чонг (56) и Нгујен Ти Пуонг Лан (46).
Машките жртви се Тран Дин Пу (37), Данг Хунг Ван (55) и 49-годишниот Хонг Тан Фам.
Шестмината последен пат биле видени живи кога оброкот бил доставен во собата во понеделникот попладне.
Првичните резултати се очекуваат во четврток.
Виетнамската влада соопшти дека нејзината амбасада во Бангкок работи со тајландските власти на случајот, додека американскиот Стејт департмент соопшти дека ја следи ситуацијата.
Смртта првично беше објавена од некои тајландски медиуми како пукање.
Хотелот, управуван од Erawan Group, има преку 350 соби и се наоѓа во популарна туристичка област во главниот град на Тајланд, позната по луксузниот шопинг и ресторани.
Премиерот Сретта Тависин вчера повика на брза истрага за смртните случаи за да се ограничи влијанието врз виталниот туристички сектор на Тајланд.
На прашањето дали смртните случаи ќе влијаат на состанокот со рускиот министер за енергетика во хотелот подоцна денеска, премиерот рече дека тоа е малку веројатно.
„Ова не беше чин на тероризам или нарушување на безбедноста, се е во ред“, рече тој.
Во 2023 година, Сарарат Рангсивутапорн, или „Ам цијанид“ како што подоцна ќе се нарече, стана првата жена сериски убиец во Тајланд.
Таа отрула 15 луѓе – на кои им должи пари – со цијанид во текот на неколку години.
Најмалку 14 од нив загинаа – еден преживеа.