За односите меѓу Северна Македонија и Бугарија и ЕУ перспективата на Западен Балкан, меѓу другото, разговарале грчкиот премиер Кирјакос Мицотакис и германскиот канцелар Олаф Шолц на нивната денешна средба, а двајцата ја истакнаа нивната поддршка за интеграцијата на регионот, јави дописничката на МИА од Атина.
На новинарско прашање за можната блокада од Грција на патот на Албанија кон ЕУ, германскиот канцелар се осврна на земјите од Западен Балкан, велејќи дека треба да се направи следниот чекор и да следи нивна интеграција во Унијата.
-Во изминатите години ги поддржав овие држави и мислам дека не треба да постои билатерализација на процесот што би ја спречила нивната интеграција и мислам дека можеме на европско ниво да најдеме решенија. Разговаравме за односите меѓу Северна Македонија и Бугарија, се надеваме дека овде може да постои успех, рече Шолц и истакна дека секогаш се на страната на интеграцијата на овие држави, паралелно изразувајќи оптимизам дека ќе се постигне успех.
Дополнително порача дека е важно „проширувањето да биде придружено со зајакнување на способноста за дејствување“, дека е потребно земјите кандидатки да ги спроведат неопходните реформи за влез во ЕУ, како и дека работат во оваа насока.
Од грчката Влада информираа дека за проширувањето на Европската Унија, особено за перспективата на Западен Балкан, Мицотакис го повторил ставот дека Грција ја поддржува интеграцијата, но истакнал дека зависи од напредокот на земјите, особено во почитувањето на владеењето на правото.
Шолц и Мицотакис на нивната денешна средба во Берлин разговарале за билатералните односи, за економијата, миграцијата, како и за темите од европски и меѓународен интерес, односно ситуацијата на Блискиот Исток.