Шпанската влада ќе побара од Јавното обвинителство да ги истражи дигиталните платформи Meta, TikTok и X за можно создавање и ширење детска порнографија со употреба на вештачка интелигенција (ВИ), објави шпанскиот премиер Педро Санчез.
Санчез рече дека овие платформи „станале пропадната држава“ каде што „законите се игнорираат, а злосторствата се толерираат“, загрозувајќи го менталното здравје, достоинството и правата на децата, објави Pais.
Владата бара од државната обвинителка Тереза Перамато да покрене соодветни законски мерки и да воспостави механизми за заштита на жртвите и нивните старатели.
Одлуката се базира на студии кои покажуваат дека корисниците на алатки како што е Grok, платформа за вештачка интелигенција од X, создале милиони сексуално експлицитни слики, вклучувајќи најмалку 23.000 со малолетници.
Шпанската влада верува дека одговорноста може да лежи и кај самите платформи поради контролата врз содржината и фаворизирањето на одредени објави од страна на алгоритмите.
Ова е дел од поширока иницијатива на Санчез против социјалните мрежи, вклучувајќи планови за забрана на пристап за лица под 16 години, следење на токсичната содржина и воведување правни механизми за повикување на одговорност на раководителите на технолошките компании.
Мерките на шпанската влада ги следат меѓународните трендови – неодамна, француските јавни обвинители извршија рација во седиштето на Х, додека Европската комисија ги истражува Meta и TikTok според Регулативата за дигитални услуги.