Во својата анализа за „The Independent“, Крис Стивенсон пишува дека Денот на победата на рускиот претседател Владимир Путин само покажал под колкав притисок е тој. Ова беше поинаква парада од оние во минатото, со помалку војска, опрема, пократка поворка и немаше традиционални прелетувања.
Можеби најдобар доказ е дека овој 9 мај беше прикажан само еден тенк, Т-34 од советската ера, додека поранешните паради беа придружени со тенковски поворки на Црвениот плоштад.
„Политико“ пишува дека освен неколку десетици оклопни транспортери, тешки тактички возила што ги користат чеченските сили и противвоздушни системи со долг дострел, најголемиот дел од „застрашувачкиот“ руски арсенал не бил ни на повидок, бидејќи најверојатно се наоѓа во акција на истокот на Украина или лежи уништено на бојното поле.
Прославите низ целата земја што секоја година беа организирани по повод Денот на победата 9 мај, беа откажани или ограничени, додека вообичаената поворка со униформирани војници и оружје во главниот град беше бледа сенка на парадите одржани пред инвазијата на Украина.
Исто така, за разлика од претходните години кога голем број странски претставници отпатуваа во Москва на парадата, овој пат дојдоа само седум лидери од седум други поранешни советски републики – Казахстан, Узбекистан, Киргистан, Туркменистан, Таџикистан, Белорусија и Ерменија.
Според руските медиуми, на парадата учествувале повеќе од 10.000 луѓе и 125 парчиња оружје и воена опрема, сепак, се проценува дека имало помалку, околу 8.000 луѓе.