СУПЕРСОЈОТ на коронавирусот би можел да се појави следната година и секое невакцинирано лице е потенцијален супертрансмитер, изјави денеска имунологот Сај Реди од швајцарскиот федерален институт ЕТХ Цирих и предупреди дека Ковид-22 може да биде многу поопасен од постојниот.
Швајцарскиот имунолог рече дека комбинацијата на постоечките соеви може да резултира со нови, поопасни мутации и поопасна фаза на пандемијата.
– Ковид-22 може да биде многу поопасен од она на што сме сведоци сега, предупреди Реди, објави „Мирор“.
Затоа, вели тој, ќе биде неопходно да се направат повеќе вакцинации во следните години, „можеби до крајот на животот“.
Зборувајќи за швајцарскиот „Блик“, швајцарскиот научник рече дека поради соеви како Делта, „ова веќе не е Ковид-19“ и предупреди дека секој што ќе одбие да се вакцинира, ќе биде заразен во одреден момент.
– Количината на патогени што Делта ја носи со себе е толку голема што секој што не е вакциниран може да биде супер преносител, нагласи Реди.
Тој додаде дека бројот на пациенти ќе се зголеми на есен и предвидува враќање на рестриктивните мерки во некои земји.
– Многу е веројатно дека ќе се појави вирус против кој нема да можеме да се потпреме само на вакцинација. Затоа треба да се подготвиме за неколку вакцини во следните години, а вакцините ќе мора да се прилагодат на новите мутации, рече Реди.
Научникот изјави дека бета и гама соевите делумно можат да избегнат антитела, додека „делта сојот е многу позаразен, но не развил механизми за избегнување на антитела“.