Шведска и Данска заеднички ќе набават и ќе ја снабдат Украина со системи за воздушна одбрана во вредност од 245 милиони евра, изјавија денеска министрите за одбрана на двете земји.
Шведскиот министер за одбрана, Пол Јенсон, изјави дека Шведска ќе го финансира купувањето на системот за воздушна одбрана „Тридон“ со 198 милиони евра, додека Данска ќе придонесе со околу 47 милиони евра, објави Ројтерс.
„Купувањето не само што ја поддржува Украина на бојното поле со повеќе воена опрема, туку и го зајакнува производствениот капацитет во Шведска“, рече Јенсон на заедничката прес-конференција во Гетеборг, Шведска, со неговиот дански колега Троелс Лунд Полсен.
Шведска и Данска обезбедуваат континуирана воена и хуманитарна помош за Украина од почетокот на руската инвазија во февруари 2022 година.