Неодамнешното палење на светата книга на исламот, Куранот, во Шведска и муслиманските протести како резултат на тоа ја влошија безбедноста и го нарушија имиџот на Шведска, соопшти денеска нејзината служба за безбедност САПО.
Во соопштението се вели дека палењето и сквернавењето на верските книги во Шведска, како и тековните кампањи за дезинформации на социјалните мрежи и на други места, имаа негативно влијание врз имиџот на Шведска, која „од толерантна земја стана непријателска кон исламот и муслиманите“.
Ова се заканува да ги подгрее заканите за Шведска од „поединци во насилното исламистичко милје“, наведува САПО, додавајќи дека ризикот од тероризам во Шведска останува зголемен на три на скала од пет.
Во Шведска, не постои законска забрана за палење или сквернавење на Куранот и другите верски текстови. Како и многу западни земји, Шведска нема закон за богохулење, а Уставот го штити правото на демонстрација, што полицијата го дозволува се додека тоа не го нарушува јавниот живот и ја загрозува јавната безбедност.