Кинескиот претседател Си Џинпинг денеска ќе ги предводи прославите во Макао по повод 25-годишнината од предавањето на поранешната португалска колонија на Кина, а ќе биде инаугуриран и новиот претседател на полуавтономната територија.
Прославите започнаа во петокот наутро по локално време со церемонија на подигнување на знамето. Си го поздрави „глобално признатиот успех“ на Макао во спроведувањето на моделот „една земја, два системи“ и додаде дека градот има ветувачка иднина.
Кога Макао се врати под кинеска власт на 20 декември 1999 година, две години по соседниот Хонг Конг, Пекинг вети дека „капиталистичкиот систем и начин на живот на градот ќе останат непроменети 50 години“.
Петочните свечености беа организирани околу инаугурацијата на Сем Хоу-Фаи, поранешен главен судија на Врховниот суд, како четврти лидер на Макао.
Тој ќе биде првиот што е роден во Кина, а не во Макао и првиот што нема да дојде од деловниот свет. Сем Хоу-Фаи го замени Хо Иат-Сенг кој е на власт од 2019 година.
Поранешната португалска трговска станица е радикално трансформирана за да стане светска престолнина на коцкањето и популарна дестинација за кинеските туристи. По неговото пристигнување во средата, Си рече дека „Макао е бисер на дланка на нацијата“ и го пофали неговиот развој.
По 442 години португалско владеење, економијата на Макао доживеа брз развој, поттикната од економскиот раст на Кина.
Територијата од 687.000 луѓе е единственото место во Кина каде што се дозволени казината. Тој коцкарски рај моментално го надминува Лас Вегас во однос на приходите од игри.