Навистина ми е чест што го добив „Златниот лав“ за животно дело од Ла Биенале на Венеција. Добивањето на оваа награда е привилегија што ја споделувам со сите филмаџии и соработници со кои сум работела низ годините. Горда сум што ја прифаќам оваа награда во чест на сите оние кои помогнаа да се оживеат овие филмови, изјави американската актерка Сигурни Вивер (74), овогодинешниот добитник на „Златниот лав“, награда за животно дело на отворањето на 81. Филмски фестивал во Венеција.
Познатата актерка има три номинации за Оскар („Alien“, „Gorillas in the Mist“ и „Galaxy Quest“), а директорот на фестивалот Алберто Барбера вели дека Сигурни нема голема конкуренција на сцената.
– Обдарена со неверојатен темперамент, способна да се движи деликатно, но без кревкост, создаде имиџ на жена која е самоуверена и решителна, динамична – рече Барбера и додаде: – „Златниот лав“ за животно дело е само признание на ѕвезда која изгради мостови помеѓу најсофистицираното уметничко кино и филмови кои ѝ се обраќаат на јавноста на искрен и оригинален начин, а притоа останува верна на себе“.
Веќе 130 години Ла Биенале на Венеција е позната како една од најпрестижните културни институции во светот, а на уметничката изложба пред две години имаше повеќе од 800.000 посетители. Овогодинешното издание на фестивалот ќе трае до 7 септември, а со 21 филм во конкуренција за главната награда на „Златниот лав“, на црвениот тепих се очекуваат Лејди Гага, Даниел Крег, Бред Пит, Анџелина Џоли… Сјајот е добредојден по штрајковите во Холивуд минатата година, повеќето студиски филмови и нивните ѕвезди од „А-листата“ ги оддалечија од најдолгиот фестивал во светот, познат како Ла Мостра.
Џоли глуми во „Maria“, биографски филм за Чилеанката Марија Калас од режисерот Пабло Ларен, кој се враќа во Венеција по неговата драма за Дијана Спенсер од 2021 година, додека Никол Кидман и Антонио Бандерас глумат во еротскиот трилер „Babygirl“ на холандската режисерка Халина Реин. За да се задржи драмата на екранот и да се избегне зад сцената, филмот „Maria“ ќе има премиера на првиот фестивалски ден во четврток, додека „Wolfs“ во кој глуми Бред Пит, поранешниот сопруг на Анџелина Џоли, ќе биде прикажан во недела.
– Анџелина ќе биде првиот ден, четврток на 29, а веднаш потоа ќе замине со Пабло Ларин во Телурид. Така Бред во Венеција ќе пристигне дури во сабота. Нема шанси да се сретнат на Лида – изјави Барбера за „Венити фер“ за поранешната двојка, која сè уште е во расправија околу старателството над нивните деца.
Клуни му се придружува на Пит во филмот на Apple TV+ од режисерот на „Spiderman“ Џон Вотс, а актерите играат ривалски професионални криминалци во акционата комедија.