Унгарскиот министер за надворешни работи, Петер Сијарто, го повтори ставот на владата во Будимпешта дека нема да дозволи Украина да стане членка на Европската Унија.
Коментирајќи ја изјавата на украинскиот министер за надворешни работи, Андриј Сијарто, за „Европска вистина“ дека „Унгарија е единствената пречка за членството на Украина во ЕУ“, тој потврди дека тоа е „целосно точно“.
„Нема ништо ново за нас во фактот дека Андриј Сибиха не е наш пријател, тој нè мрази и нè напаѓа. Сепак, во интервјуто на министерот имаше една фраза со која целосно се согласуваме: „Унгарија е единствената пречка за членството на Украина во ЕУ“. Ова е целосно точно“, напиша унгарскиот министер на Фејсбук.
Тој додаде дека додека сегашната унгарска влада е на власт, „Украина нема да биде членка на Европската Унија, бидејќи Украинците ќе донесат војна во ЕУ“.
Според него, пристапувањето на Украина во ЕУ би значело дека земјата ќе биде финансирана од европските даночни обврзници, а како резултат на тоа ќе страда европската економија.
„Нашите земјоделци би банкротирале поради житото со низок квалитет во Украина, а нашата земја би станала транзитен центар за украинската мафија. Но, сè додека сме на власт, тоа нема да се случи“, рече унгарскиот министер.
Според него, затоа Украина се меша во претстојните унгарски парламентарни избори и е заинтересирана за победа на опозициската партија Тиса.
Изборите на 12 април во суштина ќе одговорат на прашањето Мир или војна, Унгарија или Украина, рече Сијарто.
Претходно, унгарското Министерство за надворешни работи го повика украинскиот амбасадор во Будимпешта за да му предаде протест поради мешањето на Украина во изборниот процес во Унгарија.