Грчкиот премиер, Кријакос Мицотакис побара верно почитување, како и целосно спроведување на Договорот од Преспа и го финализираше вртењето за 180 степени на ставот за ова прашање, на средбата со македонскиот министер за надворешни работи, Бујар Османи, информираа од грчката опозициска партија Сириза.

Како што пренесе МИА, партијата го поздравува ставот на Мицотакис и бара од грчката Влада веднаш да ги донесе за ратификација во Парламентот трите договори со нашата земја.

„Господинот Мицотакис откако прво предизвика турбуленции без преседан во земјата со неговиот радикален популизам, откако прво се идентификуваше со Златна зора во говорот на омраза против Владата на СИРИЗА и откако ја изложи земјата на меѓународно ниво со неговата хипокризија, сега го финализираше вртењето за 180 степени за ова прашање“, посочија од СИРИЗА.

Исто така, тие додаваат и дека ја поздравуваат актуелната позиција на грчкиот премиер „кој сега, веќе и на официјален начин, го почитува Договорот од Преспа “.

„Како следен чекор го очекуваме извинувањето што го должи и на СИРИЗА за клеветењето и на грчкиот народ за измамите со лаги. Конечно во Парламентот да ги донесе билатералните договори за ратификацијата што ја одложува, бидејќи се плаши од сопствената партија“, истакнаа од таму.

Инаку, конкретните договори кон средината на септември беа доставени во Парламентот, меѓутоа поради реакциите и барањето на лидерот на СИРИЗА Алексис Ципрас, ратификацијата да биде со јавно гласање, процедурите запреа.