Украинските напади врз руски складишта за муниција резултираа со намалување на руската дневна потрошувачка на гранати за речиси половина, тврди врховниот командант на украинската армија.
Во интервју за украински Lb.ua, пренесено од Киев Индипендент, генералот Олександр Сирски рече дека Русите истрелуваат околу 40.000 гранати дневно, но дека по серијата украински напади врз магацини на руска територија и окупирани области во Украина во текот на 2024 година, тој број е речиси преполовен на околу 23.000.
„Продолжуваме да се шириме во таа насока, зголемувајќи го бројот, опсегот и можностите за длабоки удари и веќе ја преминавме границата од 1.700 километри. Нашите тимови ја зголемуваат и компонентата на дронови“, рече Сирски.
Но, тој нагласува дека Русите во меѓувреме успеале да ја зголемат потрошувачката на гранати до 28.000 дневно, што тој го припишува на можни дополнителни испораки од сојузниците како Северна Кореја и Иран или зголеменото производство во Русија.
Од друга страна, украинската армија страда од недостиг на муниција за целото времетраење на војната. ЕУ не го исполни ветувањето дека ќе произведе еден милион артилериски гранати меѓу март 2023 и 2024 година, а политичките спорови во САД доведоа до сериозно одложување на пакетот помош од 61 милијарда долари.
За успехот на украинската кампања сведочи и извештајот на Скај њуз од декември 2024 година, во кој, цитирајќи неименувани западни функционери, се наведува дека руската артилериска предност против Украина паднала на 1,5 руски гранати за секој украински.