Холивуд чека ново продолжение на култната франшиза за Џејмс Бонд, а се шпекулира дека 27-годишната Сидни Свини, ѕвездата на серијата „Еуфорија“, е на врвот на листата фаворити за новата Бонд девојка.
Според упатените, Сидни Свини е првиот избор на режисерот Денис Вилнев, а зад неа се моќните луѓе во „Амазон“, кои неодамна го презедоа „МГМ“ и сега имаат целосна креативна контрола врз франшизата.
Вилнев постојано нагласува дека пораснал со Џејмс Бонд и дека за него е голема чест и одговорност да ја продолжи таа традиција, но и да ја освежи франшизата за новата генерација гледачи. Сидни, од друга страна, е позната по својот смел избор на улоги и нејзината подготвеност да ги поместува границите, што го потврди во интервјуа каде отворено зборуваше за снимање на тешки сцени, вклучително и голи.
View this post on Instagram
Покрај Вилнев, Сидни Свини има силна поддршка и од Џеф Безос, шеф на Амазон, кој по аквизицијата на МГМ стана клучна фигура во продукцијата на новиот Бонд. Амазон е решен да ја модернизира франшизата и да ја доближи до помладата публика, а Сидни се перцепира како идеален кандидат за таа мисија.
Во меѓувреме, обложувалниците ги следат кандидатите за главната машка улога, каде што Арон Тејлор-Џонсон, како и Џек Лоуден и Тео Џејмс, се фаворити.
Денис Вилнев објави дека новото продолжение ќе ја почитува традицијата, но и ќе донесе нови елементи и свежина. Се очекува филмот да биде визуелно импресивен, со сложени ликови и приказна што ќе ги задоволи и долгогодишните обожаватели и новата публика.