Палестинската Црвена полумесечина денес соопшти дека жителите на Појасот Газа сè уште не добиле хуманитарна помош која требаше да пристигне оваа недела, и дека испраќањето на само мал број камиони со помош претставува сериозен ризик за стампедо и насилни грабежи. „Ниеден цивил сè уште не добил помош. Повеќето камиони се уште чекаат на граничниот премин Карем Шалом и не се доставени до Газа“, изјави Јунис Ал-Хатиб, претседател на Палестинската Црвена полумесечина.
Тој предупреди дека е многу тешко да се спречат стампеда и насилства што може да настанат поради недоволната количина на помош. Ал-Хатиб истакна дека активностите на Палестинската Црвена полумесечина во Газа би можеле да бидат целосно прекинати во наредните денови поради недостаток на помош и особено на гориво, што го намалува капацитетот на амбулантните возила на само една третина.
По 11 недели блокада, првите камиони со брашно и други основни залихи почнаа да пристигнуваат во најранливите делови од Газа откако Израел дозволи делумно олеснување на блокадата. Меѓутоа, палестинските претставници велат дека тоа е далеку од доволно за да ги надомести големите потреби создадени по речиси три месеци ограничувања.
Израел вчера соопшти дека пуштил 100 камиони со храна за бебиња и медицински материјали, два дена по првото олеснување на блокадата, кое беше резултат на силниот меѓународен притисок и предупредувањата за можен глад во Газа. Претседателот на Палестинската Црвена полумесечина во Женева рече дека организацијата се соочува со критична ситуација и дека нивната работа во Газа може да запре наскоро.
„Може да поминат уште неколку дена, но горивото ни е при крај. Амбулантните возила сега можат да работат само една третина од капацитетот. Некои од нив веќе престанаа да работат, а дел од возилата обезбедени од Обединетите нации користат соларна енергија“, објасни тој.
Палестинската Црвена полумесечина е дел од Меѓународната федерација на друштвата на Црвениот крст и Црвената полумесечина и обезбедува медицинска помош во Појасот Газа и на Западниот Брег, кој е под контрола на Израел. Израел, кој од 2023 година е во војна со Хамас, главната милитантна група во Газа, ја контролира и хуманитарната помош што влегува во енклавата. Израел тврди дека има доволно храна во Газа и ги негира обвинувањата дека неговата блокада предизвикува глад и страдање кај цивилите.