Новиот проект на оскаровецот Мартин Скорсезе не е уште еден игран филм за гангстери, туку документарец за антички бродоломи, на кои тој работи повеќе од една година на подрачјето на Сицилија.
Скорсезе (81) има добиено повеќе Оскари за најдобар режисер од кој било друг жив режисер, а најпознат е по филмовите Raging Bull, Goodfellas, Gangs Of New York, The Irishman, Cape Fear, The Wolf Of Wall Street, Mean Streets, The Departed и Killers Of The Flower Moon.
Американскиот режисер со италијански корени изјави дека чувствува дека публиката „може да открие нешто непознато за нив“ и дека е „благодарен на Сицилија и на Сицилијанците за пречекот што му го приредија“ за време на снимањето на документарниот филм.
Скорсезе на 7 и 8 октомври ќе престојува во Торино каде ќе му биде врачена награда од Музејот на италијанската кинематографија. Таму ќе одржи предавање.
Тој рече дека се согласува со мислењето на подводниот археолог Лиза Бригс, која му помага во снимањето на документарниот филм: „Овој проект несомнено немаше да биде возможен без неверојатната помош на Сицилијанците. Трогнати сме од пречекот на овие прекрасни луѓе“, рече тој, пренесува Хина.
Скорсезе има длабока врска со Сицилија, а за време на снимањето на филмот повторно ќе се потсети на своите корени. Неговите родители се по потекло од место во околината на Палермо. Се работи за Polizzi Generosi, живописното родно место на неговите баба и дедо. Тереза и Франческо Скорсезе емигрирале во Њујорк на крајот на 20 век.
Документарниот филм кој допрва ќе добие наслов ќе се базира на истражувањето на американскиот подводен археолог, професорката Лиза Бригс од Универзитетот Кранфилд во Велика Британија.
Иако целиот проект е обвиткан во тајност, нема сомнеж дека допирот на Скорсезе ќе вдахне нов живот во потонатите бродови и ќе ја зголеми популарноста на нуркањето во Медитеранот.
Во центарот на филмот се антички бродови, поморски бродови и потонати бродови кои зад себе оставиле не само непроценливи богатства во форма на нивниот товар, туку и информации за настани од антиката и претходни периоди на историјата.
Филмот е во продукција на продуцентската куќа на Скорсезе во соработка со партнери од неговите неодамнешни играни проекти.