Форумот на слободоумни патриоти сака да ги демантира сите кажувања кои се појавија во последните неколку дена во јавност, а се однесуваат на формирањето на новото движење предводено од Трифун Костовски.

Форумот на слободоумни патриоти ниту преговарал со амбасадори, ниту пак преговарал со Трифун Костовски и други политички и правни субјекти за формирање на некакво си движење кое има за цел прераснување во политичка партија и остварување на нечии лични и материјални цели. Целта на формирање на Форумот на слободоумни партиоти е остварување и развој на статутарните цели на ВМРО-ДПМНЕ.

Ние се залагаме за возобновување на Унијата на ветерани согласно Статутот на ВМРО ДПМНЕ и нејзино унапредување и развој. Форумот нема за цел да прави делби и расколи ниту во партијата ниту во државата, ниту има за цел некого да го омаловажува, руши или маргинализира туку негов приоритет е заложбата во државата и во политичките партии, вистинските човекови, правни и други вредности да си го најдат своето вистинско и право место.

Со самото тоа Форумот нема за цел да учествува во движење со сомнителна идеологија и сомнителни цели. Форумот на слободоумни патриоти и понатаму ќе делува во рамките на Статутот и актите на ВМРО ДПМНЕ, ќе се залага за враќање на ВМРО ДПМНЕ на вмровците и ќе се залага за демократизација на партијата и враќање на истата на основите на кои е формирана. За крај, Форумот на слободоумни патриоти уште еднаш во име на четирите свети букви ги повикува сите членови на ВМРО ДПМНЕ кои и мислат добро на партијата да застанат со нас во одбрана и спас на ВМРО ДПМНЕ!