Пилотите на “Солар импулс 2” (Solar Impulse 2) – најголемиот авион во светот кој се напојува од сонцето, Бертран Пикард и Андре Боршберг ќе останат во Кина околу еден месец, подготвувајќи се за петдневниот прелет над Тихиот Океан, пренесоа агенциите, цитирајќи локални медиуми.
“Задоволни сме што сме во Кина. За нас тоа е значајна станица пред суштинскиот дел од маршрутата”, рече Боршберг пред медиуми. Според неговите зборови, авионот ќе треба да прелета над Тихиот Океан за пет деноноќија, што е прилично комплицирана задача. Потоа пилотите ќе прелетаат над САД и ќе се упатат кон Европа. Двајцата швајцарски пилоти го прават искуство за пат околу светот со авион, придвижуван само со соларна енергија.
На 9 март “Солар импулс 2” полета од Обединетите Арапски Емирати во Оман. Следните постојки беа во Индија и Мјанмар, а на 31 март слета во кинескиот мегаполис Чонгкинг.
Авионот “Солар импулс 2” е напредна верзија на прототипот кој леташе за прв пат пред пет години. Распонот на крилата му е 72 метри – повеќе од оној на “Боинг 747” (Boeing 747), но неговата тежина е речиси колку на автомобил – околу 2300 килограми.
Крилата на авионот се покриени со 17 000 соларни панели кои напојуваат четири електрични мотори и ги полнат литиум-јонските акумулатори кои му овозможуваат на авионот да патува и во текот на ноќта.
Теоретски, авионот може постојано да е во воздухот, бидејќи енергијата акумулирана во текот на денот, го напојува и во текот на ноќта. Максималната брзина му е околу 140 километри на час.