Малолетникот кој минатата седмица уби еден и тешко повреди друг полицаец во Босанска Крупа оставил пораки на социјалните мрежи во кои се сугерира дека исламскиот радикализам бил неговиот мотив за злосторството, објавија во понеделник локалните медиуми.
„Еве ја мојата причина зошто ја напаѓам полицијата: поддршка на ционистите, желбата за ЕУ, убиства на невини муслимани и убиство на Јусуф Барчиќ“, напишал малолетниот убиец чиј напад на полициската станица во Босанска Крупа се истражува од страна на обвинителството како терористички акт.
Во преписката, чија содржина ја објави Dnevni avaz, убиецот му рекол на неименуваниот соговорник да не му праќа повеќе пораки за да „не ја има полицијата на грбoт“.
Ученик во првиот клас во средното училиште во Босанска Крупа, чии иницијали се Е.С., во преписката го сменува „убиството на Јусуф Барчиќ“, која е една од темите на бројните теории на заговор. Според ова, Барчиќ, кој своевремено беше третиран како неформален лидер на вахабистичкото движење а смртно настрадал во 2007 година, всушност е убиен.
Барчиќ со автомобилот што го возел удрил во столб за улично осветлување кај Тузла. Тогаш бил тешко повреден, а и покрај напорите на лекарите, починал во болница. Полицијата тогаш утврдила дека причина за несреќата е возењето неприспособено на условите на патот.
Дополнителна поврзаност на полицискиот напаѓач од Босанска Крупа со исламистичкиот радикализам во Полициската управа на Министерството за внатрешни работи на Федерацијата Босна и Херцеговина е откриена во тоа што неговиот вујко Исмет Седиќ наводно бил припадник на вахабистичкото движење. Тој, наводно, го вовел својот внук во тоа движење, чии членови се залагаат за наводно оригиналното толкување на исламот и не го признаваат авторитетот на секуларната влада.
Општинскиот суд во Босанска Крупа на напаѓачот му одреди едномесечен притвор, а во досегашните рации се уапсени седум мажи и се води истрага за утврдување на нивната евентуална поврзаност со убиецот. Медиумите објавија дека меѓу уапсените е и Хакија Кануриќ, професор на Исламскиот педагошки факултет на Бихаќ.
Обвинителството на БиХ во понеделник потврди дека ќе им бидат предадени сите уапсени лица од Босанска Крупа на Бихаќ. Најавија и дека истрагата сега ќе биде проширена поради сомнение за финансирање тероризам, бидејќи кај уапсените во рациите била пронајдена и значителна сума пари.
Убиениот полицаец, 53-годишниот Озрен Маран, беше погребан во саботата на гробиштата во Босански Нови, каде порано живеел, додека неговиот повреден колега Авдо Хасановиќ се наоѓа на лекување во болница на Бихаќ и е надвор од животна опасност.