Околу 100 луѓе биле поканети на пијалок среде првото заклучување во Велика Британија, објавија британските медиуми.
Очевидци потврдија за Би-Би-Си дека британскиот премиер Борис Џонсон и неговата сопруга биле на собир во градината на премиерската резиденција на Даунинг стрит 10 во Лондон.
Според е-пошта за покана објавена од ITV News, околу 100 луѓе биле поканети на „социјално дистанциран пијалок на Даунинг стрит 10“ на 20-ти мај.
Поштата беше испратена на повеќе од 100 адреси во време кога во Англија беше на сила строга блокада и беа забранети поголеми собири.
„По исклучително напорниот период, би било убаво да го искористите пријатното време и да се напиете социјално дистанциран пијалок вечерва на бројот 10. Ве молиме придружете ни се после 18 часот и понесете свој пијалок“, пишува во е-поштата.
Би-Би-Си потсетува дека на луѓето во Англија не им било дозволено да се собираат на отворени простори во групи од повеќе од шест лица до 1 јуни.
Поштата ја испратил личниот секретар на Џонсон, Мартин Рејнолдс.
Двајца очевидци изјавија за Би-Би-Си дека ги виделе Борис Џонсон и неговата сопруга Кери на собирот, кој се одржал во градината на резиденцијата на премиерот.