Средношколци од гимназијата „Орце Николов“ денес беа примени во кабинетот на министерката за образование, Мила Царовска.
Имено, на денешната средба, групата средношколци и презентираа целосно нов концепт за тоа како тие го замислуваат реформираното средно гимназиско образование.
– Се работи за документ изготвен од тим ученици како дел од проектот „Имам став“, во организација на Парламентарниот институт при Собранието на Република Северна Македонија, соопштија од Министерство за образование и наука.
Инаку, министерката Царовска на состанокот рече дека во процесот на создавањето на новиот концепт на средното образование добредојдени се сите иницијативи и идеи од учениците, наставниците и родителите, бидејќи новиот модел на образование треба да ги научи учениците критички да размислуваат и да носат одлуки врз основа на анализа и факти.
Како што информира МОН, концептот што го нудат средношколците предвидува задолжителни и изборни предмети, дигитализација на евиденцијата за отсуства и темелни промени во начинот на евалуација на знаењето на учениците.