Polestar 3 постави нов светски рекорд за автономија на електричен теренец, поминувајќи неверојатни 935,5 км со едно полнење. Целосно фабричкиот, немодифициран модел, ја надмина својата официјално презентирана автономија за дури 230 км и постави нов стандард во својата класа, пишува Autocar. Подвигот бараше речиси 23 часа континуирано возење.
Новата верзија со долг дострел на теренецот на Polestar, опремена со батерија од 107 kWh и еден мотор од 295 КС на задната оска, го сруши претходниот рекорд од 916,7 км поставен минатата година од Ford Mustang Mach-E. Возењето беше извршено по јавни патишта во источна Англија, вклучувајќи локални патишта и автопати со две ленти.
Клучната информација е дека автомобилот бил целосно фабрички, без никакви модификации, дури и со стандардните гуми Michelin Sport 4 EV. Polestar откри и еден интересен детаљ: теренецот продолжил да вози уште 13 километри откако дисплејот покажал дека батеријата е на 0%, што значи дека вистинскиот досег можел да биде уште поголем.
За време на рекордното возење, Polestar 3 постигнал извонредна просечна потрошувачка од само 12,1 kWh на 100 километри. Ова е ниво на ефикасност постигнато од некои многу помали и полесни електрични автомобили, иако овој теренец тежи 2,4 тони.
Овој резултат го става во сенка и неодамнешниот подвиг на пикапот Chevrolet Silverado EV, кој помина 1.706 километри. Иако е импресивно, ова беше постигнато со мали модификации, двојно поголема големина на батеријата (205 kWh) и пониска просечна ефикасност.
Сем Кларк, еден од тројцата возачи кои учествуваа во подвигот, објасни зошто овој рекорд е важен. „Ова е рекорд на „патување“, што значи дека користиме јавни патишта, мора да се придржуваме до вообичаените ограничувања на брзината и не можеме да одиме по истиот пат двапати, па во основа правиме еден многу голем циклус, најдобро што можеме.“
Токму овој услов ги создаде најголемите предизвици. Кон крајот на возењето, тимот се соочил со затворање на патишта поради велосипедска трка. „Секој пат кога се обидувавме да ја смениме насоката, се соочувавме со уште едно затворање на патот“, рече Кларк, но брзата реакција на навигаторот го спаси обидот.
Кларк истакнува дека овој вид рекорд е порелевантен за клиентите отколку за оние поставени на затворени патеки. „Ни за момент не сугерираме дека некој може да ги постигне истите дострели што ги постигнавме ние, но значително ги надминавме бројките на WLTP, па затоа само покажува што е можно“, додаде тој.
Според него, бројки како овие покажуваат дека „електричните возила навистина можат да одат далеку сега“, а поимот „вознемиреност од дострел“ полека бледнее, иако тој признава дека „инфраструктурата сè уште треба да продолжи да се подобрува како што напредува технологијата на возилата“.