Кинеската државна компанија „Shanghai Space Satellite Technologies“ ги лансираше првите 18 сателити со намера да создаде огромна орбитална мрежа за ривал на „Starlink“.
China Securities Journal, кој го води агенцијата Ксинхуа, наведува дека првата ракета со сателити полетала од центарот за лансирање Таихуан во провинцијата Шанкси.
Овие сателити се првиот чекор во напорите на компанијата да изгради мрежа од 15.000 сателити во ниската орбита на Земјата, која компанијата ја нарече „Соѕвездие на илјада едра“. Планирано е мрежата да биде завршена до 2030 година.
Домашните медиуми проектот го нарекуваат кинеска верзија на „Старлинк“, која моментално има 6.000 сателити. Илон Маск рече дека планира мрежата на крајот да има 42.000 сателити.
„Соѕвездието на илјада едра“, познато и како проект Г60, е една од трите големи сателитски мрежи што Кина планира да ги распореди.
Се очекува дека повеќето од сателитите ќе орбитираат околу Земјата на височина помеѓу 320 и 2.000 километри над површината, што е висината на која се наоѓаат и сателитите „Старлинк“.
Трите главни мрежи, заедно со десетици амбициозни вселенски проекти од други кинески фирми, беа поттикнати од напорите на централната влада да го вклучи приватниот сектор во своите научно-технолошки цели.
Останатите две мрежи се очекува да имаат уште 23.000 сателити во орбитата.
„China Securities Journal“ проценува дека кинеската вселенска индустрија ќе вреди 321 милијарда долари до крајот на 2024 година.