Британската автомобилска индустрија ризикува да биде десеткувана доколку владата на Велика Британија повторно не преговара за договорот за „Брегзит“ со Европа.
Ова го велат шефовите на Stellantis, кои им порачаа на политичарите дека стотици илјади работни места висат на конец, пренесе Carscoops.
Производителот на автомобили се осврнува на сегашниот трговски договор, чии услови ќе предвидат електрични комбиња на Opel, Peugeot и Citroen да се извезуваат од Британија во Европа под тарифи од следната година. Договорот постигнат меѓу Обединетото Кралство и ЕУ вели дека 45 отсто од вредноста на електричното возило мора да дојде или од Британија или од ЕУ за да се избегнат тарифите што важат од 2024 година.
Stellantis има фабрика во Лутон што произведува големи комбиња и друга во Елесмер Порт, која претходно го произведуваше хечбекот Astra, но беше претворена во фабрика за Opel/Vauxhall Combo и нивните роднини Peugeot Partner и Citroen Berlingo. Планот за трансформација од 100 милиони фунти (126 милиони долари) беше наведен во 2021 година кога Stellantis беше уверен дека ќе може да ги исполни условите од трговскиот договор, но сега вели дека тоа нема да се случи и сака рокот да биде продолжен до 2027 година.
„Ако трошоците за производство на електрични возила во Британија станат неконкурентни и неодржливи, операциите ќе се затворат“, рече Stellantis.
Mini веќе одлучи да ја произведува електричната верзија на својот нов хечбек во Кина, наместо во Оксфорд, каде што ќе продолжи да произведува Mini со SUS мотори.
Говорејќи за радио Би-Би-Си, поранешниот шеф на Aston Martin, Енди Палмер, моментално претседател на европскиот производител на батерии „ИноБат“, посочи дека 800.000 работни места во Обединетото Кралство се загрозени доколку владата брзо не преговара за својот трговски договор.