Генералниот секретар на НАТО, Јенс Столтенберг, изјави дека Алијансата е вознемирена од талибанската офанзива во Авганистан и ги предупреди бунтовниците дека Западот нема да ги смета за легитимни ако ја преземат земјата со сила.
Столтенберг по средбата со амбасадорите на НАТО изјави дека „сојузниците се длабоко загрижени за големото насилство по офанзивата на Талибанците, вклучувајќи напади врз цивили, целни убиства и извештаи за други сериозни прекршувања на човековите права“.
Тој вели дека Талибанците мора да разберат дека меѓународната заедница нема да ги признае ако ја преземат земјата со сила и дека НАТО е „посветен на политичко решение на конфликтот“.
Талибанците беа охрабрени од одлуката на администрацијата на Џо Бајден претходно оваа година да ги повлече американските војници и да ја заврши мисијата на НАТО за обука во Авганистан.
Повеќето војници на НАТО веќе заминаа, а преостанатиот дел треба да се повлече до 31 август.
Столтенберг рече дека целта на НАТО „останува да ги поддржи авганистанската влада и безбедносните сили што е можно повеќе“.
Неколку земји, вклучувајќи ги и САД, го евакуираат персоналот од нивните амбасади во Кабул.