Зеленилото и дрвјата во градовите не само што носат убавина и мир, туку имаат и моќ да разладуваат, штитат и спасуваат животи за време на топлотни бранови. Иако сите го чувствуваме овој ефект кога се засолнуваме во сенка во текот на жешките летни денови, не беше јасно колку тоа навистина значи за здравјето на луѓето.
Студија од Универзитетот Монаш во Мелбурн, според самите автори, е првата што пресметува колку зголемувањето на зеленилото би можело да го намали бројот на смртни случаи поврзани со топлината во урбаните средини, на глобално нив, помеѓу 2000 и 2019 година.
Доколку градовите беа за 30% позелени, во текот на двете набљудувани децении, дури 1,16 милиони животи би биле спасени со намалување на температурата за, во просек, 0,19 °C, според научниците.
Во основното сценарио, околу 3,2 милиони смртни случаи од 2000 до 2019 година се припишуваат на изложеност на топлина. Со други зборови, благодарение на зеленилото, би биле спречени над една третина од сите смртни случаи предизвикани од топлина.
Дури и помал степен на озеленување би имал позитивно влијание врз јавното здравје: со 10% повеќе вегетација, би можеле да се избегнат 860.000 смртни случаи, додека 20% повеќе зеленило би спасило 1,02 милиони животи.
Ова дело беше објавено кон крајот на април во престижното научно списание „The Lancet Planetary Health“. Проекциите се базираат на податоци за смртност и температура од дури 830 локации од 53 земји, кои потоа беа екстраполирани на секој поголем урбан центар, над 11.000 од нив. За мерење на зелената покривка беше користен посебен индекс на вегетација „EVI“, базиран на сателитски снимки.
Како што е објаснето во истражувањето, зголемувањето на индексот на вегетација има ефект на ладење и значително го намалува ризикот од умирање од топлината.
Површините под трева, дрвја и други растенија во густо населените урбани средини не само што ни обезбедуваат привремено зелено засолниште од топлината, туку помагаат и во ладењето на околината преку испарување. Како резултат на тоа, бројот на луѓе погодени од екстремна топлина се намалува, а условите за живот драстично се подобруваат.
Позитивното влијание на зеленилото се забележува низ целата планета, а особено во неколку жаришта, вклучувајќи ја Јужна и Источна Азија, како и Јужна и Источна Европа.
Намалувањето на емисиите и енергетската транзиција остануваат најважните чекори во борбата против климатските промени. Сепак, не смееме да го заборавиме зеленилото, кое се покажа и како неопходен сојузник во заштитата на јавното здравје и спасувањето животи за време на сè почестите топлотни бранови.